Jodler Wucheend Adelboden
Mir hei am 29./30.03.2025 es wunderbars Wucheend in Adelbode dörfe verbringe. Uf üsem Tagesprogramm si Atemüebige u Jodlertechnike gstande. Mit der güebte Theorie heimer de zäme chöne zwöi Lieder ihstudiere u singe. Mir danke der Regina Sschneider für dä super Jodlerungerricht.
U natürlech het oh der zwöit Teil s gmeinsame "Beisammensein" nid dörfe fähle.
Ds Jodlerchörli Weier wünscht Euch äs Guets Glückhafts Neus Jahr
Vorakündigung Konzert 2025
Ou im 2025 wei mir wider äs Konzert düreführe ds Affoltere i dr Chiuchä. Darum tüe mir Euch scho mau ds Datum düregä so das dir das i eueri Agända chöit Ihschriebä.
U zwar wär das am:
Samschtig Obä 24.05.2025
u am
Sunntig Namittag 25.05.2025
A beidnä Tag wärde mir ungerstütz vo Gastformationä. Für Ungerhautig u Verpflegig tüe mir natürlich ou luege. Witteri Informationen tüe mir euch Fortloufend hie bekanntgä.
Mir freue üs scho itz uf Euere Bsuech
Fritzenfluh
Am Samschtig am 17. Ougschte hei mir dörfe mit üsne Jodelkläng ds Jubiläumsfescht
"10 Jahre Panoramarestaurant Fritzenfluh" umrahmä. Mir säge Danke viu mau für die wunderbari Gastfreundschaft u dä schön Tag uf dr Fritzefluh u wünsche am Fritzefluh Team ou für die nächste 10 Jahr viu Erfolg
Unteremmentalisches Jodlertreffen 2024 Burgdorf
Am Sunntig 4. Ougschte isch äs wieder sowit gsi. Ufäm Feschtgländ vo de Schwingfescht ds Burgdorf isch bi schönstem Wetter u beschter Stimmig ds Ungerämmitalische Jodlerträffe über d Bühni gangä.
Ou mir vom Weierchörli si natürlich mit drbi gsi, u hei ä wunderbare Tag zäme mit dr Ungerämmitaler Jodlerfamilie verbracht u gnosse.
Allmendhubel - Chilbi
Am Sunntig 28. Juli het ds Jodlerchörli Weier als Gastformation a dr traditionellä Allmendhubel - Chilbi dörfe ufträtä. Nachäme richhaltige Zmorgeässe ufem Schilthorn hei mir die Chilbi bi schönschtem Biuderbuechwätter i voue Züg gnossä. Mir Danke am Jodlerklub Stechelbärg für d Ihladig u für dä wunderschön Tag bi Euch.
Bernisch Kantonales Jodlerfest 2024 in Langnau
Vom 14. bis am 16. Juni isch Langnau im Emmental Gastgäber vom Bärnisch Kantonale Jodlerfescht 2024 gsi. Mir vom Jodlerchörli Weier hei mit äm Lied "Herbstmelodie" vo dr Miriam Schaftroth teilgnoh, u hei für üse Vortrag vo de Jurore äs "Guet" dörfä i Empfang nä. Aus absolute Höhepunkt vom 2024 wird üs das Jodlerfescht, wo bi schönschtem Wetter stattgfunge het no lang i beschter Erinnerig bliebe. Mir Danke am OK vom Jodlerfescht Langnau für das wunderschöne und rundum glungnige Fescht.
Houptprob für ds Jodlerfest
Zähme mit em Jodlerklub Obergoldbach het ds Jodlerchörli Weier ds Landiswil i dr Chiuche ihrer Lieder für ds Bärnisch Kantonale Jodlerfescht in Langnau am Jürg Wenger vortreit. Sinä genauä u strängä Ohre isch keis falsches Töndli entgangen, u so isch de gfielet, u wiederholt worde, bis du dr Jürg zfriede gsi isch. Danke viu mau Jürg Wenger für d Ungerstützig u dini fachkundige Expertise. Natürlich git soviu Üebä u Wiederhole ou Hunger u Duscht. Dämm isch mä du im Ahschluss zähme mit dä Obergoldbacher im Löie ds Landiswil Herr u Meischter worde.
Schonegg Chilbi
Ou das Jahr het ds Jodlerchörli Weier wieder dörfe a dr Schonegg Chiubi ufträtä.
Merci viu mau am Jodlerklub Wase für eui Gastfründschaft.
Konzert 2024
Nach längerer Pouse het ds Jodlerchörli Weier im 2024 wieder äs Konzert düregfüehrt. Mir si Überwältigt gsi das mir üsi Lieder zwöi mau hei dörfe irä vouä Chiuche ds Affoutere vortragä. U drum säge mir Euch aunä Danke viu mau für euiä Bsuch a üsem Konzert. Äs het üs riesig Gfreut. Ou äs riesegrosses Dankeschön üsne Gastformatione, am Jodlerduett "Wyberhärz", am Terzett Schär-Schär-Brunner, dr Kappele Enzian u de Balmer Büeble das dir üses Konzert mit öinä Vorträg bericheret heit .
U natürlich wei mir ou aune Sponsore, Gönner, u Häufer nid vergässe Danke viu mau ds sägä.
Ehrenveteran Fritz Allenbach
Am 3. Februar si ds Zollbrück i dr Ballsporthalle d Veterane Ehrige vom BKJV düregfüehrt worde.
Üse Fritz Allenbach het dert dörfe ds Abzeiche zum Ehre-Veteran i Empfang nä.
Liebe Fritz, sit 50 Jahr pflegsch du üsese Bruchtum ds Jodle mit Härzbluet, u sit 50 Jahr bisch Du ou ä Teil vom Jodlerchörli Weier. Zu dere ungloubleche Leischtig Gratuliere mir dir vo ganzem Härze zu derä Uszeichnig. Mir vom Jodlerchörli Weier si sehr stoutz uf di.